أشمعنى الويب ؟؟

أشمعنى الويب ؟؟

سؤال غريب بس فعلا  ناس كتير بتحبه و أغلب الطلبه بتفكر تشتغل في مجال الويب

يمكن لأنه من المجالات اللي عمرها ما هتختفي من السوق جايز عشان عمرنا ما هنبطل ندخل علي النت

اي حاجة بتحتاج تعرف اي حاجة عنها بتروح داخل على الموقع بتاعها حتى دلوقتي المحلات بيعملو مواقع لنفسهم عشان يعرفوا الناس منتجاتهم و اسعارهم لو بيبيعو حاجة بالتالي انت قدام مجال مستمر الى ما شاء الله

طب هل الموضوع صعب أننا اتعلم ويب ؟ 

مجال الويب عموماً بينقسم لحاجتين :

web designer
web developer

خلينا نمسك ال web design الاول ..

كان زمان فى واحد لما تسأله حضرتك بتشتغل ايه يقولك انا ويب ديزاينر دلوقتى الوضع اختلف الموضوع بقا بينقسم لتلات أقسام و مش هتلاقي حد شغال ال 3 مع بعض 
UI Designer

UX Designer

UI Developer

طيب مين التلاتة دول و بيعملو ايه ؟

UI Designer

ده واحد كل شغلته انه بيعمل تصميم للويب سايت ده على اى برنامج من برامج ال graphic design زي ال photoshop و ال illustrator معظم الناس شغالة photoshop في الديزاين .. بس بعض الناس بيفضلو illustrator عشان شغال بحاجة اسمها vector graphics .. و دي معناها ان الديزاين بتاعك مهما تكبره او تعمل zoom مش هيبكسل .. و دا بيكون كويس لو هتعمل logo لشركة او مؤسسة

UX Designer/Developer

الراجل ده بيعتبروه دكتور نفسى ف المقام الاول .. عشان بيحاول يحط نفسه مكان المستخدم ويوصله كل حاجة محتاجها من غير حتى ما يطلبها... وعشان يبقى راضى تماماً عن الويب سايت ده وعشان الراجل ده بياخد الكلام من العميل ويفهم هوه عاوز ايه ف الويب سايت 

يعني مثلا لو هتعمل موقع عن الايس كريم فا انت عايز الموقع يكون موحي بالسعادة .. حاجة خفيفة ظريفة .. مليان الوان فاتحة .. فيه صور كتير تخيل انت داخل موقع الايس كريم دا و لقيت الوان غامقة و سودا نفسك هتتسد بالتالي لازم ال UX  يكون فاهم نفسية العميل و يبص لاي موقع من وجهة نظر المستخدم عشان يقدر يعمل موقع مناسب لرغبة المستخدم

UI Developer

الراجل ده بقا بياخد الديزين من ال UI Designer متقطع جاهز ويبدأ يحوله ككود ويظهر كويب سايت على المتصفح بحيث انه يستجيب لتفاعلك معاه و لما تدوس على حاجة تدخلك على اللي بعدها و هكذا ..
طب أيه الحاجات اللى لازم يبقى عارفها الراجل ده أو يتعلمها الراجل ده ؟
HTML, HTML5, CSS, CSS3, JavaScript, JQuery, Bootstrap
ومش لازم يبقى عارف كل حاجه فيها المهم اللى يخصه ك UI Developer

نتكلم بقا عن الحاجه التانيه وهي Web Developer

المجال ده عموماً فيه ناس بتشتغل فيه بأكتر من لغه زى  PHP ,.NET ,Python ,JSP
طب هل فى لغة منهم احسن من التانيه ؟ اللى يقولك كده يبقى بيشتغلك كل الفكره ان شركه بتشتغل بلغه وشركه تانيه بتشتغل بلغه تانيه يعنى الموضوع مالهوش علاقة بان لغة اصعب من لغة او ان لغة اهم من لغة .. في النهاية اللغات دي مجرد ادوات انت بتستخدمها عشان تكود .. يعني الفرق في الاخر فيك انت مهما كانت الاداة اللي معاك

الخلاصه الموضوع بقا بينقسم لجزئين

Front End

وده المسئول عن الشكل العام اللى بيظهر للمستخدم ف الويب سايت من كذا ناحيه و و تعتبر وظيفته مشابهة نوعا ما لل UI Developer

Back End

وده بيتعامل مع السيرفر والداتا بيز وطريقه عرض البيانات من الداتا بيز وطبعاً كل الكلام ده على حسب كل ويب ابلكيشن بيتعمل .
يعني مثلا لو انت عملت sign up في فيسبوك عشان تعمل اكاونت جديد .. الاسم الجديد بتاع الاكاونت و الباسوورد و اي حاجة تخص الاكاونت هتروح لل data base بتاعت ال سيرفر بتاع فيسبوك .. و لما تيجي تخش على فيسوك بالاكاونت اللي انت عملته فا هيدور على الاسم و الباسوورد اللي انت دخلتهم و لو موجودين هيدخلك على صفحتك .. و هكذا .. كل الليلة دي بقى مسئولية ال back end developer

عموما المجال دا كبير جدا و واسع جدا و متشعب .. بس احنا حاولنا نقرب الفكرة على قد ما نقدر و انت ممكن تمسك في حاجة معينة عجبتك و تدور فيها لحد ما تجيب اخرها