حبشتكنات يا سيدى شويه كلام مرصوص صح عشان نتعلم صح مش العقد بتاعت كلمه صعبه و خلاص 👊 على فكرة انت بتقول اى كلام و السلام لا يا حبيبي مش ان تابعنا و هتعرف انى اد القول

ببساطة كده دى فكرة قررنا نبدأ فيها عشان نساعد بعض عشان نتعلم طيب يا فالح هنتعلم ازاى مع بعض؟
 بص يا سيدى احنا هنبدأ نجيب كورس اونلاين نعمل جروب سوا و نبدأ نذاكره و نسأل بعض و فى مدربين كمان هيردوا على أسألتنا و نبدأ نكون فرق مننا و نبدأ نعمل باللي اتعلمناه شغل free lance و ممكن نعمل start up كمان
 بس فى مشكله كمان؟
يا ابنى انت بتخلق مشكله و خلاص المهم قول ايه تانى يا سيدى؟
انا معرفش انجليزى كويس هذاكر ازاى؟
يا سيدى هنبدأو هنعمل تلخيص بالعربي لحد ما نحسن من لغة اى حد عنده ازمه مع اللغه. ها لاقيت مشاكل تانى
لا كده مفيش مشكلة خالص
ملكش حجة
 شير في الخير

- خد يعم انت بعد ما عرفتنى الفرق بين تصميمم المواقع (الديزين) وبين تطوير المواقع (الديفولب) سايبنى كدا ورايح ع فين دا الموضوع شكله كبير اوووووى كلمنى بالتفصيل اكتر عن الراجل اللى بيصمم المواقع دا اللى اسمه الويب ديزينر
- بس ياسيدى اولا الويب ديزين دا متقسم لكذا وظيفة
- ياراااااااجل :D
- اه والله انتا مصدوم ليه كدا عندك واحد اسمه Ui Designer
 ال UI دا اختصار لكلمة (User Interface) يعنى واجهة المستخدم يبقا اسم الوظيفة علي بعضه اسمها مصمم واجهة المستخدم
- طب بيعمل ايه الراجل دا بالزبط ؟؟
- انت مستعجل ليه انا جايلك ف الكلام اهو الراجل دا بتبقى شغلانته الجزء الخاص بالجرافيك ورسم صورة افتراضية للموقع على برنامج جرافيك مثلا زى الفوتوشوب .... وكمان بيختار الالوان المناسبة وبيرسملك شكل الموقع بتاعك كصورة نهائية من خلالها تقدر تتخيل موقعك هيبقى عامل ازاى ودا ملهوش دعوة بالكود خالص ولا بيكتب كود واحد حتى هيا مهمتة الوحيدة التخيل والابداع من حيث الالوان والشكل النهائى اللى هايطلع للراجل يشوفه
- طب بقولك ايه سوال اخير طيب ايه المهارات اللازمة عشان ابقى UI Designer شاطر ؟؟
- بص ياسيدى خبرة ف التعامل مع برامج الجرافيك وخبرة فى الالوان وتناسق الالوان
اكلمك بقي عن ابن عمه UI Developer اللى هوا مطور واجهة المستخدم
- استنا بس متلغبطناش طب الراجل دا ايه الفرق بينه وبين اللى الديزينر
- بسيطة جدا مش انا قولتلك انا ال UI Designer دا بتاع الالوان والفوتوشوب
- اه قولتلى كدا فعلا
- يبقى UI Developer بتاع الكود بقا وهوا دا الراجل المسؤؤل عن تحويل الصورة دى لصفحة ويب ويقدر العميل يشوفها قدامه ويتفاعل معاها مش مجرد صورة ثابتة ملهاش لازمة بمعنى اصح بقا خلصنا مرحلة التخطيط نخش على مرحلة التنفيذ بالكود والبرنس دا هوا اللى بيكتبلنا الاكواد
- يااااااسلاااااااااام الشغلانة دى باين عليها حلوة
- اه والله جدااااااا وممتعة جدا واحلى مافيها انك قاعد بتتفاعل مع الكود وحاجة لذيذة اووووى
- تصدق والله انا بدأت احب الويب من كلامك فهمنى بقا ايه المهارات بتاعت البرنس دا
- من عنيا اول حاجة لازم يكون فاهم HTML / CSS كويس جدا لان معظم شغله هيبقا معتمد عليهم ويبقا عارف اساسيات JavaScript ويعرف يتعامل مع مكتبة jQuery كويس وطبعا مننساش الفريم ورك العالمى البوتسراب
- حبيبى يعم حبشتكانى
خليك حبشتكانى

- حبشتكانى ... حبشتكااانى
- أيون
- عايزك تعملى صوره وانا واقف جنب الهرم
- صوره ازاى يعنى وانت جنب الهرم .. ليه !!
- يا عم انت بتعرف فى الجرافيك ديزين وبتعرف تشتغل على البرامج الحلوه دى وانا لاء frown emoticon
- طب وانت ايه اللى منعك انك تتعلم ما تجرب واهو تعمل صورك بنفسك يا عم
- حبشتكانى انا معرفش يعنى ايه جرافيك ديزين اصلا او يعنى ايه ديزاين frown emoticon
- طيب خلاص يا عم هقولك
- امممم جرافك ديزاين دا يعنى فن دمج بين الخيال والحقيقه اى حاجه فى حياتنا معتمده على ديزاين دا لان مع بدايه موجود الانسان كان الفطره الاولى ليه هى الخيال والخيال مربوط بالابتكار والفن ال ديزين دا بقا عباره عن ناتج شويه ابتكار على شويه تخيل ولمسه جماليه وشويه معلومات يعنى شويه فن على شويه افكار يطلعولك ديزاين
- طيب حلو مطلوب منى ايه بقا علشان اصمم..... اكيد طبعا فوتوشوب ؟؟
- الديزاين مش بس فوتوشوب ومش بس برامح التصميم اللى على الكمبيوتر التصميم ككل ممكن يكون مرسوم او مجسم التصميم ببرامج الكمبيوتر بس هو دا اللى بيعتبر جرافيك ديزاين غير كدا ف هو ديزاين حتى الرسم البيانى دا يعتبر ديزين بردو !
- طيب حلو هو مين اول واحد قال جرافيك ديزاين دى ؟؟
- بص يا سيدى ويبام اديسون هو اول واحد قال جرافيك ديزاين سنه 1922وكان وجهه نظره ان مش اى حد يبقى جرافيك ديزاينر لكن اللى يقدر يجمع بين الصوره واللون والكلمه هو دا الجرافيك ديزينر اللى يقدر يدمج ويمزج بينهم بوجهه نظر ونظره مختلفه نظره ثانيه للواقع دا
- طيب هو انا ممكن استخدم الجرافيك ديزاين دا فى ايه تانى غير انى اعمل صورتى جنب الهرم ؟؟
-يا عم تقدر تستخدم الجرافيك ديزاين دا فى كل حاجه ليها شكل مش شرط الهرم بس انت ممكن تحطها جنب اى حاجه ماديه او حتى افتراضيه تقدر تعملها جرافيك ديزاين
- طب ما تقولى كدا مجالات شغل اقدر استخدم فيها الجرافيك ديزين دا
- تقدر تستخدمه فى تصميم البنرات واللوح والفلايرز تقدر تستخدمه فى تصميم العربيات وتصميم الديكور تقدر تستخدمه فى تصميم المواقع وتقدر تشتغل فيه فى تعديل الصور زى المصورين كدا. تصدق انت ممكن تستخدمه فى تصميم شكل علب الادويه والادويه نفسها واشكال واحجام الاجهزه الطبيه !! وبردو فى المجالات الهندسيه !! مش قولتلك تقدر تستخدمه فى كل حاجه ليها شكل ومش بس دول دا فى حاجات تانيه كتييير
-اااه دا شكله موضوع كبير اووى
-طيب هو انا لو عايز اتعلم الجرافيك ديزاين دا واكون شاطر اعمل ايه ؟
- عندك برامج كتييير تقدر تتعلم عليها وتبتكر وتفكر وتطلع حاجات حلوه
- دا لازم اكون فنان علشان اعرف اتعلم عليها
- لاء خالص يا عم البرامج دى مجرد ادوات انت بتتعلمها وبتتعلم ازاى تتعامل معاها بشكل صح والباقى افكار يعنى بمعنى اصح ممكن اى حد يتعلم البرامج دى وممكن اى حد يشتغل عليها بس اللى هيبفرق هى الافكار والموهبه الفنيه وبس يا عم
- طب ما تقولى كدا شويه اسامى للبرامج دى بدل منا معرفش غير الفوتوشوب
-يا عم سهله دى عندك الفوتوشوب والاليسترتور وعندك السولد ورك للرسومات الهندسيه عندك ال لايت رومينج علشان تعديل الصور وعندك اليونيتى لرسم المجسمات زى الديكور
ركز مع #حبشتكانى واستنى اللى جى مع الديزاينر وانت هتعرف تعمل صورك جوا الهرم نفسه مش بس جنبه

يعنى ايه Freelancing ؟ و يا ترى فى مجال معين او ناس معينه هى اللي بتشتغله؟

بص يا سيدي الــfreelancing  معناه انى بقدم خدمة بمقابل مادى , كل خدمه ليها وقت تنفيذ على حسب حجم المشروع .. طبعا الخدمة مش لازم تبقي فى مجال معين يعنى ممكن يبقى برمجة، تصميم، كتابة، ترجمة وهكذا طول ما بتقدر تعمل خدمة بمقابل مادى تانى حاجة لازم اللى بيدخل فى الــ freelancing تكون خبرته كويسه جدا فى المجال اللى هو هيشتغل فيه عشان يبقى عارف الاخطاء اللى ممكن يقع فيها لان انت دلوقتى ” حر نفسك ” و انت اللى بتتعامل مع العملاء مباشرة يعنى انت اللى بتدير المشروع و دى مش اى حد يقدر يعملها غالباً اللي شدك للموضوع هو فكرة انك ممكن وانت قاعد في البيت تكسب فلوس كتيييير جدا بدون اي مجهود يؤسفني يا عزيزي اني اقول لك ان الفكره دي غلط وان اللي بيكسب من الــ freelancing بذل مجهود كبير جدا لحد ما وصل للدرجه دي, ولحد ما قدر يوفر لنفسه دخل محترم ينافس مرتبات وظائف الناس بتحلم بيها. المهم

لو انت لسه بتبدأ أو حتي شغال من فتره في العمل الحر هقولك شوية نصايح هتساعدك كتير انك تبدأ فعلا في كسب دخل محترم او تزود دخلك الحالي ان شاء الله

- اول نصيحه متشتغلش من السرير

    تقريبا كلنا و خصوصا فى الشتا بنحب ناخد اللابتوب في حضننا ونريح علي السرير طول اليوم  و دي كارثه بكل المقاييس فلازم تقوم من على السرير حالا لو انت عايز تنجح ... ليه بقا؟؟؟؟؟بيقولك ان فيه حاجه اسمها الـComfort Zone أو منطقة الراحه ودي منطقه الانسان بيحب يأنتخ فيها لانه مستريح وأهم Comfort Zone لأي حد هي اوضه نومه و سريره بالذات بنسبة كبيرة طول ما انت فيها هتحس على طول بالخمول والنوم فانتاجيتك وابداعك هيقل بكل تاكيد ,

فلو عايز فعلا تحقق نجاح في العمل الحر , لازم تخرج من منطقه الراحه اللي هي "غرفة النوم" وخد اللابتوب اطلع في الصالون او فوق السطوح حتي...... أو اي حته بعيده عن منطقة الراحه وابدأ الشغل بجد  .

- تانى نصيحه خليك جاد 

    يعنى لو انت داخل المجال كتجربه يا صابت يا خابت فانصحك انك تخرج حالا وتفكر في شغلانه تانيه , لازم عشان تنجح في المجال دا انك تأخده بجديه فعلاً , وان دا شغل زي اي شغل وتلزم نفسك بساعات عمل كأنك في وظيفه في قطاع خاص . علميا اي حد بيعمل حاجه معينه لمدة 4 ساعات يوميا في سبيل تحقيق هدف معين بيوصل فعلا في النهايه لتخقيق الهدف دا. فحاول تلزم نفسك بعدد ساعات معين تشتغل فعلا وبجد لأنها وظيفه زي اي وظيفه تانيه.

- تالت نصيحة انك تطور من نفسك باستمرار

   لازم ما توقفشي عند حد معين , يعني مش علشان اتعلمت برنامج فوتوشوب تقول خلاص انا كدا Professional Graphic Designer ....لا يا راجل... !!! لازم عشان فعلاً توصل لدرجة الاحترافيه انك تتعلم وتطور نفسك باستمرار وما توقفشي ابداً لان التعلم ليس له نهايه .فمثلاً لو انت مستواك متوسط في برنامج معين مثلا فوتوشوب , ابحث عن دورات مستويات متقدمه و اتعلم و طور نفسك باستمرار ..... وهكذا مع اي برنامج تاني .

- رابع نصيحة متستعجلش

    انا عارف ان أصعب حاجه هي الانتظار , فعلاً دي حقيقه محدش يقدر ينكرها . انت ممكن تذاكر و تشتغل وما يجيلكش شغل و ما تكسبشي حاجه فيجيلك اكتئاب وتزهق وتسيب الموضوع خالص , بس أحب أقولك ان الموضوع بيحتاج وقت . يعني انت لو حابب تأكل لحمه مش بتحطها علي النار وتستني حوالي علي الاقل 30 دقيقه ...ينفع بقا انك بعد 3 دقائق تطلع اللحمه وتقول انها بايظه وترميها في الزباله .....انت رمتها لانك ما استنتشي عليها وما انتظرتش لحد ما تستوي. اى حاجه فى الدنيا كده لازم تاخد وقتها متستعجلش و ما تملش أبداً و حاول تستغل الوقت دا تطوير نفسك باستمرار

- خامس نصيحه اتعلم من الناجحين

    النجاح في اي حاجه ما بيجيش من يوم وليله , النجاح بيكون نتيجه تجربه طويله مريره ومشاكل وضغط مستمر , فعشان تجنب نفسك المشاكل والضغط دا , حاول تتعلم من الناجحين في المجال اللي انت بتفكر تدخله , تواصل معاهم واسألهم واستفسر منهم عن كل حاجه , ولو هما من المشاهير زي ستيف جوبز او مارك زاكربرج فبيكون لهم فيديوهات بيحكوا فيها عن تجاربهم, وحاول تستفيد قدر الامكان من قصص نجاحهم. 

النجاح في الـ Freelncing محتاج إنك تركز وتتخصص في مجال معين لان أغلب اللي بيشتغلوا Freelncer  بيكون عندهم أكتر من مهارة. مثلا الـWeb developer  ممكن يكون شاطر في الـprogramming  و ممكن يكون كمان اشتغل في تصميم الجرافيك من ناحية و عنده هواية الكتابة من ناحية تانية .. لو اشتغلت في كل اللى بتعرف تعمله مرة واحدة هتشتغل أكتر و طبعا كل ما الشغل زاد معناه دخل أكبر. بس الموضوع ده مش بينفع للكل لان بعد شوية وقت المعاناة بتبدأ عشان في النهاية هتوصل لمرحلة تشتت ذهني وعدم تركيز في كل المجالات اللى بتتقنها، ونسبة كبيرة من الأعمال اللي نجحت في الأول و بعدين فشلت كان سببها الإفراط و التوسع في مجالات كتير. احسن حل انك تقارن بين كل المجالات اللى بتحبها و حدد مجهودك الأساسي المفروض يتركز في أي مجال أكتر من التاني، المؤشر اللى ممكن يحدد لك تختار أي مجال فيهم هو أي واحد فيهم بيعمل فلوس أكتر من التاني و بالتالي هيكون عندك سبب منطقي يخليك تكمل في مجال ما أكتر من غيره، و لو أكتر من مجال بيدخلوا دخل كويس فمش منطقي أبدا انك تسيب أي مجال منهم في سبيل التركيز في مجال واحد و عدم التشتيتت، ممكن في الحالة دي تشغل معاك ناس تانية شاطرة في المجالات دي و بكده تبقى وسعت شغلك و في نفس الوقت ركزت مجهودك لمجال واحد رئيسي و مضيعتش فرصة الدخل اللى جايلك من طرق تانية.

نيجى بقي لأكبر المشاكل اللى بتواجه الـ freelancers هى ضياع وعدم تنظيم الوقت، خصوصا لو شغلك بيكون على الكمبيوتر والنت.. طيب والحل؟!علشان تخرج برة الدايرة دى لازم تلزم نفسك بجدول زمنى محدد كل يوم، وفى وقت الشغل تقفل كل اللى ممكن يشغلك، و لو شغلك مش محتاج نت تقدر تفصله. و فى حالة التزامك بالجدول تكافىء نفسك بوقت راحة محدد تعمل فيه حاجه بتحبها، وبكده فى كل مرة هتستسلم فيها وتخرج عن الجدول هتلاقى نفسك بتتعاقب تلقائيا بحرمانك من الراحة و المكافأة اليومية.. و مع الوقت التزامك بالجدول الزمنى يتحول لعادة. و فيه مشكلة تانية ممكن تواجهك هي انك بعد تسليم الشغل المطلوب منك أفتكرت ان فى أجزاء نسيت تحطها..أو نسيت تشتغل عليها؟ و ترجع تشتغل على المشروع من تانى..و يضيع منك وقت ومجهود ، طيب و الحل؟؟ انك قبل ما تبدأ تشتغل أكتب خطة للمشروع اللى هتشتغل عليه فيها كل المطلوب منك، و ضيف عليهم أفكارك و قسم الخطة فى شكل خطوات 

.

لو عايز تعرف اكتر دى شويه لينكات هتفيدك:

شرح لموقع خمسات

 https://goo.gl/TMLD9v

شرح موقع فايفر

  https://goo.gl/l8ZnRz

محاضرات مهندسة سمر صبحى

 https://goo.gl/h1P9mF

مجموعة محاضرات عن الفريه لانسج والتعامل مع المواقع وسحب الفلوس من هنا

https://goo.gl/7zRPWi

خليك حبشتكانى

C++ Programming Basics For 

Beginners

:List Contents

Introduction to Computer Programming

C++ Basic Concepts 

Data Types

Making Desicions 

Loops 

Functions  

Arrays 

Strings  

Structs

click here

لو عايز تبقي مبرمج فاشل تعال معانا و احنا هنحطك على الطريق الصح للفشل

الخطوة الأولى عشان تبقي مبرمج فاشل

اتعلم اكتر من لغة فى نفس الوقت عشان يبقى اسمك مبرمج جامد وعارف لغات كتير و لو انت متعلم لغة معينة كفاية عليك اوي اللى انت متعمله متحاولش تطور نفسك وتعرف الجديد

و بكده انت اخدت اول خطوة فى طريقك للفشل 

شكلك لسه مصر تكمل فى الفشل ماشي يا سيدى

الخطوة الثانية عشان تبقي مبرمج فاشل

جيب كتب كتييير و فيديوهات اكتر و تقعد تقرأ و تسمع كتير على اد ماتقدر من غير تطبيقو اى حاجة تقرأ عنها لمدة خمس دقايق اكتبها فى الـــ CV على طول و اكتب إنك محترف فيها

عاجبني اصرارك و هكملك اهووووو

الخطوة الثالثة عشان تبقي مبرمج فاشل

اوعى تنقل معلوماتك لغيرك عشان محدش يتفوق عليك و دايما قارن نفسك بغيرك و حاول تحاربه عشان ميبقاش ناجح اكتر منك

مادام وصلت لهنا بقي اكملك و امرى لله

الخطوة الرابعه و الاهم من كل اللي فات

اى مشروع يجيلك اقبله على طول من غير ما تفكر بس نسيت أقلك فكر فى الفلوس أولا و أخيرا و لما يجيلك مشروع هياخد شهر شغل اقعد ضيع تلات اسابيع واشتغل فى اخر اسبوع 

و بكده انا حطيتك على اول طريق الفشل كمبرمج

و ربنا يقدرنا على عمل الخير

حاسبات يعنى برمجه 

هصدمك و اقولك ان الكلام ده مش صح 

طبعا لو قلنا السوق المصري هنقول الفكرة العظمى ان حاسبات بتخرج مبرمج سواء Web او Mobile او Desktop Application طبعا دول لو اتخصصت فيهم هتلاقى شغل كتير بس بصراحه انت مش بتتعب و تتعلم 4 سنين فى الكليه عشان في الاخر تشتغل مبرمج بتستخدم لغة برمجة واحدة بعدين ايه الفرق بينك و بين اي واحد واخد كورس في اللغة دي و خلاص ؟
البرمجة جزء كبير من حاسبات لكن هى فى الاخر وسيله مش الهدف الحقيقي الاصل في حاسبات انك بتحل مشاكل باستخدام الكمبيوتر زى مشاكل ذكاء اصطناعي – شبكات – انظمة متوازية – محاكاة - خوارزميات و غيرها و هنا بتستخدم لغة البرمجة عشان تتواصل مع الكمبيوتر و تتكلم معاه و تخليه يحل المشكلة دي يعني لغة البرمجة اداة مش علم و عشان نحل مشكلة في مجال من دول مش لازم تكون فاهم المجال نفسه الاول هنا بقى ييجي دور الكلية انك بتدرس التخصصات دي جوة الكلية كعلوم عشان تفهمها في حد ذاتها بطريقة مطلقة و بعدين لما تيجي تطبقها على الكمبيوتر تستخدم لغة برمجة .. اي لغة برمجة بقى مش مشكلة .. المهم انك فهمت العلم نفسه و فهمت انت عايز تعمل ايهفي كل المشاكل انت هتكتب نفس الكود و الكود هينفذ نفس الخطوات .. الفرق بس هيكون في طريقة كتابة اللغة نفسها .. يعني مثلا طريقة كتابة الكود على لغة c++ غير طريقة كتابته على Java بس النتيجه فى الاخر واحده

و دا الفرق بين خريج كمبيوتر و بين اللي واخد كورس

دا يعرف علم .. لكن دا يعرف اداة او وسيله